प्रधानमन्त्री केपी शर्मा ओलीले राजधानी काठमाडौंसहित देशभर आइतबारदेखि मान्छे र गाडीको चहलपहल बढेकामा असन्तुष्टि प्रकट गर्दै लकडाउनलाई कडाइका साथ लागू गर्न उच्चस्तरीय समन्वय समिति र गृह मन्त्रालयलाई निर्देशन दिएका छन् ।
सरकारी कर्मचारीहरुलाई कार्यालय समय तोकेर आइतबारदेखि काठमाडौंमा ‘टाइम कार्ड’ लागू गरिएपछि कार्यालय समयमा सवारी जाम देखिएको थियो । लकडाउनमा राजधानीमा सवारी जामका तस्बिर र समाचारहरु आएपछि सामाजिक संजालमा समेत चर्चा भएको थियो ।
उनले मान्छेको जीवनभन्दा आर्थिक गतिविधि ठूलो नहुने बताएका थिए । लकडाउनको पालना गराउने कुरामा कुनै कमीकमजोरी हुन नहुने पनि उनले बताए ।
प्रधानमन्त्रीको निर्देशनलगत्तै गृह मन्त्रालयले एक जिल्लाबाट अर्कोमा जान दिने गरी जारी गरिएका सबै पास खारेज गरेको छ ।
