काठमाडौं । नेपाली कांग्रेसकी केन्द्रीय सदस्य एवं प्रधानमन्त्री पत्नी डा. आरजु राणा देउवा एक साताका लागि भारत जाने भएकी छिन् । उनी मंगलवार भारत जानेछिन् । उनको भ्रमण राजनीतिक भने नरहेको निकटस्थहरूले बताएका छन् ।
‘उहाँको हेल्थ चेक अपको फलो अप छ । विशुद्ध उपचारका लागि जान लाग्नुभएको हो’, निकट स्रोतले भन्यो ।
गत पुसमा पनि उनी भाइ भूषण राणाको उपचारका लागि भन्दै भारत गएकी थिइन् । त्यति बेला आरजुले राजनीतिक भेटघाट समेत गरेकी थिइन् । यस पटक पनि भारतमा रहँदा राजनीतिक भेटघाट हुनसक्ने सम्भावना छ ।
नेपालमा मन्त्रिपरिषद् पुनर्गठन र लोसपालाई सरकारमा सहभागी गराउने चर्चा चलिरहँदा आरजुको भारत भ्रमणलाई राजनीतिक दृष्टिले पनि हेरिएको छ ।
कांग्रेस केन्द्रीय सदस्य आरजुले पछिल्लो समय राजनीतिक एवं कूटनीतिक भेटवार्तालाई तीव्रता दिदैं आइरहेकी छिन् ।
