छिल्लो समय चर्चामा रहन सफल किया सेल्टोसको रिकिन्डसन बजारमा समेत खोजी हुन थालेको छ । नेपाल भित्रिएको २ बर्ष अवधि पुरा गरेको यो एसयूभी ग्राहकको रोजाइमा पर्न थालेपछि सेकेन्ड ह्यान्ड समेत भनिने रिकिन्डसन बजरमा माग बढ्न थालेको हो । माग बढेपनि सेकेन्ड ह्यान्ड बजारमा बिक्री गर्ने ग्राहक नभएका कारण यसको कारोबार भने शून्य मात्रामा रहेको व्यवसायीहरुको भनाइ छ ।
रिकिन्डसन गाडीको कारोबार गर्ने संस्था नेपाल रिकन्डिसन अटो व्यवसायी संघका कार्यवाहक अध्यक्ष रमेश कोइरालाका अनुसार एसयूभी पारखीको रोजाइमा किया सेल्टोस पर्न थालेपछि सेकेन्ड ह्यान्ड बजारमा यसको माग बढ्दै गएको छ । नयाँ मोडल भएका कारण रिकिन्डसन बजारमा आउन अझै समय लाग्ने भएपनि ग्राहकले सेल्टोसको माग गर्न थालेको उनले बताए ।
‘रिकिन्डसन बजारमा माग बढ्नु भनेको उक्त सवारीको लोकप्रियता समेत बढ्नु भएका कारण एसयूभी सेग्मेन्टमा किया सेल्टोसको भविष्य राम्रो छ’ उनले भने, ‘हाल रिकन्डिसन बजारमा हुन्डाई क्रेटा, फोर्ड इकोस्पोर्ट, सुजुकी ब्रेजा र महिन्द्रा स्कर्पियोको कारोबार उच्च रहे पनि किया सेल्टोसको भने माग अनुसार उपलव्ध नहुँदा कारोबार शून्य मात्रामा रहेको छ ।’
कोरियाली कम्पनी हुन्डाई मोटर्स अन्तर्गतको कियाको बिगत लामो समयदेखि नेपाली बजारमा कारोबार हुँदै आइरहेको छ । भारतीय बजारमा उत्पादन शुरु भएपछि नेपाल भित्रिएको सेल्टोसले एसयूभी सेग्मेन्टमा आफ्नो बजार हिस्सा निरन्तर बढाउँदै लगेको छ ।
सोल्टोसले हाल हुन्डाई क्रेटालाई कडा टक्कर दिइरहेको छ । नेपाली बजारमा सेल्टोसको पेट्रोल र डिजेल इन्जिनमा गरी कुल ७ वटा मोडलको कारोबार हुँदै आइरहेको छ । बिक्री बढ्दै गएपछि आधिकारिक बिक्रेता कन्टिनेन्टल इन्टरप्राइजेजले सेल्स र सर्भिस नेटवर्क समेत बिस्तार गर्दै लगेको छ । हाल देशका १ दर्जन बढी स्थानमा कियाको सेल्स र सर्भिस नेटवर्क स्थापना भएका छन् । नेपाली बजारमा यसको मूल्य ४९ लाख ९० हजारदेखि ७६ लाख ९० हजार रुपैयाँसम्म निर्धारण गरिएको छ ।
