काठमाडौं । काठमाडौं उपत्यकाका तीन जिल्लामा जारी निषेधाज्ञालाई थप कडाई बनाइएको छ । मंगलबार बसेको तीन जिल्ला (काठमाडौं, ललितपुर र भक्तपुर) का प्रमुख जिल्ला अधिकारीको संयुक्त बैठकले निषेधाज्ञालाई कडाई गर्दै साँझ ८ बजेपछि सार्वजनिक तथा निजी सवारीसाधन सञ्चालनमा रोक लगाउने निर्णय गरेको हो ।
आजको तीन जिल्लाका सीडीओको संयुक्त बैठकले निषेधाज्ञालाई थप कडाई गर्दै उक्त निर्णय गरिएको काठमाडौंका प्रमुख जिल्ला अधिकारी कालिप्रसाद पराजुलीले जानकारी दिए ।
उनका अनुसार कोभिड–१९ भाइरसको संक्रमण बढ्दै जाँदा रात्रिकालीन समयमा हुने सवारीसाधनको आवतजावतमा कडाइ गरिएको हो । यस्तै उपत्यकामा १५ दिन निषेधाज्ञा थप गरिएको छ । थपिएको निषेधाज्ञा ८ भदौसम्म जारी रहनेछ ।
यसअघि घोषित निषेधाज्ञाको अबधि भोलि (साउन २७) गतेबाट सकिँदै छ । दोस्रो लहरको कोरोना संक्रमितको संख्यामा बृद्धि भएकोभन्दै गत बैशाख १६ गतेदेखि उपत्यकाका तीन जिल्लामा निषेधाज्ञा लागु गरिएको हो ।
