कोरोना भाइरसको आशंकामा हालसम्म चार हजार ४२६ जनाको नमुना परिक्षण गरिएको स्वास्थ्य तथा जनसंख्या मन्त्रालयले जनाएको छ । मन्त्रालयले आज गरेको पत्रकार सम्मेलनमा मन्त्रालयका प्रवक्ता डा.विकास देवकोटाले राष्ट्रिय जनस्वास्थ्य प्रयोगशाला टेकुमा कोरोना भाइरसको आशंकामा हालसम्म ३ हजार ३९२ को कोरोना परीक्षण गरिएको बताए ।
हरेक दिन करिब ८ सय जनासम्म कोरोना भाइरसको आशंकामा नमुना संकलन गरेर परीक्षण भइरहेको उनले जानकारी दिए ।
“शनिवार (आज) देशैभरका अस्पतालका आइसोलेसनमा ८२ जना उपचाररत रहेका छन्,” उनले भने, “काठमाडौं उपत्यकामा १५ जना काठमाडौं बाहिर ६७ जना अस्पतालमा उपचाररत रहेका छन् ।”
त्यसैगरी, सात प्रदेशका क्वारेन्टाइनमा ८ हजार ८२ जना रहेका मन्त्रालयले जनाएको छ । र्यापिट टेष्ट किटबाट शुक्रबारबाट परीक्षण भइरहेको छ भने सुदुरपश्चिम जिल्लाका सबैमा यो किटबाट परीक्षण भइरहेको मन्त्रालयका प्रवक्ता डा.देवकोटाले बताए ।
“मन्त्रालयले सञ्चालनमा ल्याएको दुई वटा कल सेन्टर १११५ र ११३३ मा तीन हजार ४० जनाको गुनासो सम्बोधन गरिएको छ,” उनले भने, “दार्चुलामा हाल नमुना संकलन गरिरहेको छ ।” हालसम्म संक्रमितको संख्या ९ रहेको तर एक जना निको भइसकेको छन् भने दुई जना टेकु अस्पतालमा, ४ जना सेती प्रादेशिक अस्पताल र धवलागिरी अञ्चल अस्पतालमा उपचार भइरहेको उनले जानकारी दिए ।
वीर अस्पताल र आइतबार टेकुस्थित शुक्रराज ट्रपिकल तथा सरुवा रोग अस्पतालमा पनि कोरोना परिक्षण गरिने मन्त्रालयले जनाएको छ ।
