अन्तर्राष्ट्रिय मुद्रा कोष (आईएमएफ) ले नेपालसहित कोरोना प्रभावित २५ मुलुकलाई अनुदान दिने निर्णय गरेको छ । आईएमएफले कोरोना भाइरसकोे प्रभावलाई सम्बोधन गर्न ती मुलुकलाई आर्थिक सहयोग गर्ने निर्णय गरेको हो ।
आईएमएफको सञ्चालक समितिको बैठकले ५०० मिलियन डलर अर्थात् करिब ६० अर्ब रुपैयाँ नेपालसहित २५ वटा आफ्ना सदस्य देशलाई सहयोग गर्ने निर्णय गरेको हो ।
कोषकी प्रबन्ध निर्देशक क्रिस्टिलिन जर्जिवाले विज्ञप्ति जारी गर्दै नेपालसहित २५ देशलाई कोभिड १९ बिरुद्ध लड्नका लागि आवश्यक आर्थिक सहयोग गर्ने निर्णय गरेको बताएकी हुन् ।
यो अनुदानले गरिब र कमजोर देशहरूलाई आगामी ६ महिनामा प्रारम्भिक चरणका लागि कोषको ऋण दायित्व पूर्ति गर्न सहयोग पुग्ने उनले जनाएकी छन् । यो सहयोगले महत्त्वपूर्ण र अत्यावश्यकीय चिकित्सकीय र अन्य राहतका लागि वित्तीय साधन परिचालन गर्न मद्दत पुग्ने विश्वास आईएमएफले गरेको छ ।
यो सहयोगका लागि बेलायत सरकारले १ सय ८५ मिलियन डलर र जापान सरकारले सय डलर सहयोग गरेको कोषले जनाएको छ । चीन र नेदरल्यान्ड पनि सहयोग गर्न लागेको पनि जनाइएको छ ।
मुद्रा कोषबाट सहयोग पाउनेमा नेपालसहित अफगानिस्तान, कंगो, माली, रुवान्डा, ताजकिस्तान, हैटीलगायतका २५ देश छन् ।
