अमेरिकाको भर्जिनिया राज्यमा एक नेपालीको दुखद निधन भएको छ । अमेरिकाको प्रसिद्ध फेनी मे नामक प्रतिष्ठानमा कार्यरत स्वर्गीय सुनिल श्रेष्ठ डिसी महानगर क्षेत्रको डिसी फुटबल क्लब (डिसिएफसी) खेलाडी पनि हुन् । केही महिना अगाडी एन्फाका पूर्व अध्यक्ष गणेश थापा अमेरिका आउँदा आयोजना गरिएको एक मैत्रीपूर्ण खेलमा उनले खेलेका थिए ।
डिसिएफसीका संयोजक चन्द्र लामा तथा उक्त क्लबका टोली प्रमुख बिज्ञान श्रेष्ठले गहिरो दुख व्यक्त गरेका छन् । मृतकका भाई अस्ट्रेलियाबाट र मृतकका मामा तेक्वान्दोका मुख्य प्रशिक्षक सन्तोष प्रधानले सान फ्रान्सिस्कोबाट यस बिषयमा लामा संग कुराकानी गरि रहेका छन् ।
उनी बस्ने रेस्टन शहरस्थित अपार्टमेन्टमा उनको निधन भएको प्रहरीले पुष्टि गरेको छ ।
उनी आफ्नो कार्यालयको नियमित बैठकमा २ दिन अगाडि सम्म सहभागी भइरहेका थिए । स्वर्गीय श्रेष्ठलाई भाइ मान्ने छिमेकी भारतीय महिला क्रिस्टेन धिङ्गले गत सोमबार आफ्नो घरमा स्वर्गीय श्रेष्ठ आएको जानकारी दिइन् ।
उनका अनुसार २ दिन अगाडि विहान आयोजित वैठकमा सहभागी भएका स्वर्गीय श्रेष्ठ मध्यान्ह आयोजना गरिएको वैठकमा सहभागी नभएपछि उनको खोजी सुरु भएको थियो । आफैं आयोजना गरेको वैठकमा अनुपस्थित भएपछि उनलाई कर्मचारीहरु र उनका भारतीय साथीहरुले खोजी सुरु गरेका थिए ।
पतिसंग सम्पर्क हुन नसकेपछि नेपालमा रहेकी पत्नीले छिमेकी क्रिश्टेनलाई गुहारेकी थिइन । क्रिश्टेन र उनका पतिले पटक पटक घण्टी वजाउंदा पनि ढोका नखुलेपछि अपार्टमेन्टलाई खवर गरेर प्रहरी वोलाइएको थियो ।
प्रहरीले चिकित्सक र एम्वुलेन्स कर्मचारी वाहेक कसैलाई पनि भित्र प्रवेश दिएको थिएन । आज विहान ९ः३० देखि करिव अपरान्ह २ः३० सम्म प्रहरीले आफ्नो अनुसन्धान जारी राखेको थियो । फर्कनु अघि प्रहरीले क्रिश्टेनलाई सुनिलको मृत्यु करिव १२ घण्टा अघिनै भएको जानकारी दिएको थियो । प्रहरीले सुनिलको शव अपार्टमेन्ट भित्रै ढलेको अवस्थामा भेटाएको थियो ।
चिकित्सकले स्वर्गीय श्रेष्ठलाई सीपीआर दिएर वचाउन कोशिस गरेको तर नसकेको क्रिश्टेनले वताइन । शव परीक्षणबाट थप केही जानकारी आए परिवारलाई उपलव्ध गराउने पनि प्रहरीले वताएको छ ।
मेरिल्याण्ड राज्यका नेपाली मूलका राज्य बिधानसभा सदस्य ह्यारी भण्डारीले यस दुखद क्षणमा नेपाली समुदायमा परेका यी समस्याहरुको समाधानको लागि सम्बन्धित नियकामा पहल गरिरहेको जानकारी दिएका छन् । अमेरिकामा रहेका कोरोना भाइरसबाट प्रभावित र निधन भएका नेपाली समुदायलाई सहयोग पुर्याउन विभानसभा सदस्य ह्यारी अहोरात्र खटीरहेका छन् ।
विधानसभा सदस्य भण्डारीले भर्जिनियामा मृत्युवरण गरेका स्व श्रेष्ठको पत्नीको ईच्छा अनुसार नेपाल शव पठाउने बिषयमा बिकल्प हुन् सक्ने र आफूले गर्न सक्ने कोसिस गर्ने बताए ।
डेलिगेट भण्डारीले चिकित्सा जाँच कार्यलयका जासुस याक्लिन नामक व्यक्ति संग कुरा गरि श्रेष्ठको मृत्यु भएको पुष्टि भएको छ । स्व सुनिल श्रेष्ठको नेपालमा एक ७ महिनाको छोरी र ५ बर्ष मुनिको एक छोरा रहेका छन् ।
उनका नजिकका नातेदार तथा आफन्तले नेपाली दुताबास पनि सम्पर्क गरेका छन् । स्व श्रेष्ठ अमेरिकी नागरिक हुन् । उनि ३/४ बर्ष अगाडी टेक्ससबाट डिसी क्षेत्र आएका हुन् ।
