काठमाडौं । काठमाडौं महानगरले पार्किङ दर निर्धारण गरेको छ । महानगरले काठमाडौंको स्थानअनुसार फरक फरक पार्किङ दर तोकेको हो ।
महानगरले जारी गरेको आर्थिक ऐन २०७८ अनुसार दरवारमार्ग, न्युरोड, कान्तिपथ, रत्नपार्क, लैनचौर र त्रिपुरेश्वर क्षेत्रमा मोटरसाइकल तथा स्कुटर पार्किङ गर्दा पहिलो ३० मिनेटको १५ रुपैयाँ र १ घन्टाको २५ रुपैयाँ निर्धारण गरेको हो । त्यस्तै सोहि स्थानमा चारपांग्रे सवारी साधन पार्किङ गर्दा पहिलो ३० मिनेटको ५० र एक घन्टाको ८० रुपैयाँको दरले पार्किङ शुल्क तिर्नु पर्ने छ ।
माथि तोकिएको स्थानभन्दा महानगरको अन्य स्थानमा पार्किङ गर्दा दुई पाङ्ग्रेलाई प्रतिघन्टा १५ रुपैयाँ तोकिएको छ । त्यस्तै चारपाङ्ग्रे सावरी साधनका हकमा भने ४० रुपैयाँ र हेभी सवारी साधनले प्रतिघन्टा १०० रुपैयाँका दरले पार्किङ शुल्क तिनु पर्नेछ । तर, इलेक्ट्रीक सवारी साधन पार्किङ गर्दा भने कुनै पनि शुल्क तिर्नु पर्ने छैन । त्यस्तै बिशेष अपांगता भएको व्यक्तिले प्रयोग गर्ने सवारी साधनमा पनि पार्किङ शुल्क लाग्ने छैन ।
महानगरले पार्किङ निषेधित स्थानमा दुई पाङ्ग्रे सवारी साधन पार्किङ गरेको पाइएमा १ हजार र तीन पाङ्ग्रे सवारी साधनमा २ हजार जरिवाना लाग्ने बनाएको छ ।
चारपाग्रे सवारी साधनको हकमा भने इन्जिन क्षमता अनुसार जरिवाना लाग्ने भएको छ । १ हजार सीसीसम्मको सवारी साधन अनाधिकृत पार्किङ गरेमा २ हजार ५ सय रुपैयाँ, १ हजारदेखि १ हजार ५ सय सीसीसम्मको ५ हजार रुपैयाँ, १ हजार ५ सयदेखि २ हजार २ सय सीसीसम्म ७ हजार रुपैयाँ र २ हजार २ सय सीसीभन्दा माथिका साधनलाई १० हजार रुपैयाँ जरिवाना निर्धारण गरेको हो ।
