काठमाडौं, २८ असार । मुक्तिनाथ विकास बैंकले १ अर्ब २५ करोड रुपैयाँ बराबरको १२ लाख ५० हजार कित्ता ऋणपत्र निष्काशन तथा बिक्रीमा ल्याउने तयारी गरेको छ । बैंकले साउन ७ गतेदेखि ७ वर्षका लागि वार्षिक ‘८.७५ प्रतिशत मुक्तिनाथ डिबेन्चर २०८४, ८५’ निष्काशन तथा बिक्रीमा ल्याउने तयारी गरेको हो ।
कुल ऋणपत्रबाट ५० करोड रुपैयाँ बराबरको ५ लाख कित्ता ऋणपत्र सर्वसाधारणका लागि रहेको छ । जस्बाट सामूहिक लगानी कोषका लागि २५ हजार कित्ता छुटयाईएको छ । बाँकी रहेको ७५ करोड रुपैयाँ बराबरको ७ लाख ५० हजार कित्ता ऋणपत्र बैंकले व्यक्तिगत किसिमले विभिन्न संघ संस्थाहरुलाई बिक्री गर्ने भएको छ ।
लगानीकर्ताले ऋणपत्र खरिदका लागि साउन ११ गतेसम्म आवेदन दिन सक्नेछन । उक्त म्यादभित्र माग बमोजिमको आवेदन नपरेको खण्डमा साउन २१ गतेसम्म आवेदन पेश गर्न सकिने छ ।
वार्षिक ‘८.७५ प्रतिशत मुक्तिनाथ डिबेन्चर २०८४, ८५’ को लागि लगानीकर्ताले सि-आस्वा सदस्य रहेका बैंक तथा वित्तीय संस्था र शाखा कार्यालयहरुबाट आवेदन दिन सक्नेछन ।
बैंकको ऋणपत्र निष्काशन तथा बिक्री प्रबन्धकमा सानिमा क्यापिटल लिमिटेड रहेको छ ।
