काठमाडौं । बुधबारको बजारमा पनि नयाँ कीर्तिमानी कामय भएको छ । मंगलबार उच्च बिन्दुमा पुगेको बजार बुधबार पनि उच्च बिन्दुमा पुगेर नयाँ रेकर्ड राख्न सफल भएको छ ।
नेप्से परिसूचक १५.३० बिन्दुले बढेर ३०९४.९५ बिन्दु पुगेको छ । जुन हालसम्मकै (दैनिक क्लोजिङ्गको) उच्च बिन्दु हो । दिनभरको कारोबारमा भने परिसूचक बढेर ३११३ बिन्दुसम्म पुगेको थियो । तर पछि ३०९४.९५ बिन्दुमा फर्किएर बजार बन्द भएको छ ।
मंगलबारको तुलनामा नेप्से परिसूचक बढेपनि सेयर कारोबार भने घटेको छ । मंगलबार १५ अर्ब बढी कारोबार भएको बजारमा बुधबार भने १३ अर्ब २९ करोड रुपैयाँ बराबरको सेयर किनबेच भएको छ ।
बुधबार २१९ कम्पनीको २ करोड ८१ लाख ७० हजार १७२ कित्ता सेयर खरिद बिक्री भएका छन् । जसमध्ये बढी कारोबार गर्नेको अग्रस्थानमा हाइड्रो कम्पनी रहेका छन् । त्यसमा पनि सबैभन्दा बढी युनाईटेड मोदी हाइड्रोपावरको सेयर कारोबार भएको छ । कम्पनीको एकैदिन ३८ करोड ६१ लाख रुपैयाँ बराबरको सेयर कारोबार भएको छ ।
त्यसैगरी, कारोबारमा आएका कम्पनीमध्ये ३ कम्पनीको सेयर मूल्यमा सकारात्मक सर्किट लागेको छ । नारायणी डेभलपमेन्ट बैंक, मल्टीप्रपर्स फाइनान्स कम्पनी र चन्द्रागिरी हिल्सको सेयर मूल्य १० प्रतिशतले बढेर सर्किट लागेको हो । यी तीन कम्पनीको सेयर मूल्य क्रमशः ८०३ रुपैयाँ, ५३४.८० रुपैयाँ र १६३७.९० रुपैयाँ पुगेको छ ।
सो दिन सबैभन्दा बढी पञ्चकन्या माई हाइड्रोपावरको सेयर मूल्य ५.०७ प्रतिशतले घटेर प्रतिकिता ३५६ रुपैयाँमा झरेको छ ।
बुधबार बैंकिङ्ग, हाइड्रोपावर, उत्पादनमूलक र म्युचुअल फण्ड समूह राताम्मे देखिएका छन् भने बाँकी समूहमा हरियाली छाएको छ ।
