काठमाडौं । काठमाडौं उपत्यका अपराध अनुसन्धान कार्यालयले हुन्डी र गैरकानुनी सटहीमा संलग्न रहेको आरोपमा कालिमाटीबाट एक जनालाई पक्राउ गरेको छ । पक्राउ पर्नेमा बाराको पचरौता नगरपालिका- ७ स्थायी घर भएका ५४ वर्षीय जयकमल शाह कलवार रहेका छन् ।
शाह बस्दै आएको दुइटा फ्ल्याटबाट १७ लाख ६६ हजार ३०० नेपाली रुपैयाँ र १२ लाख ८ हजार ७०० भारतीय रुपैयाँ बरामद भएको काठमाडौं उपत्यका अपराध अनुसन्धान कार्यालयका प्रमुख बसन्त कुँवरले जानकारी दिए ।
हुन्डी कारोबारमा संलग्न रहेको सूचना पाएपछि प्रहरी कलवार बस्दै आएको घरमा शनिबार साँझ पुगेको थियो । प्रहरीका अनुसार कलवारले आफू एक्लै बस्दै आएको देखाउन भूईंतलामा अन्य व्यक्तिहरुसँग खाना खाने गरेका थिए । सोही तलामा उनको एउटा कोठा पनि थियो ।
तर, करिब १० लाख रुपैयाँमात्र उक्त फ्ल्याटमा भेटिएपछि प्रहरी त्यसभन्दा माथिको तलामा पनि छिरेको थियो । जहाँ एक महिला सुतिरहेकी थिइन् । सोधपुछका क्रममा ती महिलाले आफ्नो छोरा बाहिर गएको र श्रीमान भारतमा रहेको बताएपछि प्रहरीको शंका बढ्यो । त्यसपछि पहिलो तलामा रहेका व्यक्तिसँग सोधपुछ गर्दा उनीहरुले ती महिला कलवारकै श्रीमती रहेको बताएका थिए ।
तर, ती महिला उल्टै प्रहरीसँग झम्टिएकी थिइन् । प्रहरीका अनुसार चिन्दै नचिनेको मान्छेलाई मेरो श्रीमान भन्छौ भन्दै उनी जंगिएकी थिइन् । त्यही क्रममा उक्त फ्ल्याटमा एउटा परिचयपत्र भेटियो । परिचयपत्रमा रहेको तस्विर आफ्नो छोराको रहेको महिलाले बताएपछि प्रहरीलाई अनुसन्धानमा सजिलो भयाे । परिचयपत्रमा बाबुकाे रुपमा कलवारकै नाम थियो ।
प्रहरीले केरकार बढाएपछि ती महिलाले कलवार श्रीमान रहेको स्वीकारेकी थिइन् । त्यसपछि उक्त फ्ल्याटमा रहेको दराज खोलेर हेर्दा प्रहरीले २६ लाख नेपाली नगद बराबरको नेपाली र भारतीय रुपैयाँ बरामद गरेको थियो ।
