सत्तारुढ नेपाल कम्युनिस्ट पार्टी (नेकपा)को प्रतिनिधि सभाकी सांसद रामकुमारी झाँक्रीले संसदबाट पास भएको भूमिसम्बन्धी कानून भू–माफियाका लागि रहेको बताएकी छिन् ।
नेपाली रेडियो नेटवर्कमा बिहीबार बिहान पत्रकार ऋषि धमलासँग कुरा गर्दै युवा नेतृ झाँक्रीले भूमिसम्बन्धी कानूनले भूमिहीन र सुकुम्बासीका लागि केही गर्न नसक्ने बताइन् ।
‘संसदबाट पारित भएको भूमिसम्बन्धी कानून जग्गा नभएका र सुकुम्बासीका लागि होइन । यो त भू–माफियाहरूको लागि मात्र हो’, उनले भनिन्, ‘संसदीय समितिमा छलफल हुँदा मैले यो कानून सुकुम्बासी र भूमिहनका लागि उचित छैन भनेर सुझाव नै राखेको थिएँ ।’
भूमिसम्बन्धी कानून गलत प्रक्रियाबाट आएको भन्दै झाक्रीले यस्तो गलत कानूनले सरकार र पार्टी दुवैलाई हानी गर्ने चेतावनी दिएकी छिन् ।
नेकपाकी नेतृ झाँक्रीले भूमिसम्बन्धी कानूनमा भएको व्यवस्थाअनुसार भूमिहीन र सुकुम्बासीलाई कुनै फाइदा नगर्ने बताइन् । उनले ठूला जग्गा प्लटिङ गर्दै हिँड्ने भू–माफियाहरूलाई मात्रै फाइदा हुने बताइन् । ‘भू–माफियाले आफ्नो जग्गालाई प्लटिङ गरेर बेचेर कमाउन पाउँछ । जग्गा साटफेर गर्न पाउँछ । यसरी त सुकुम्बासीको समस्या समाधान हुँदैन ।’
भू–माफियाहरूसँग मिलेका केही सीमित नेता तथा व्यापारीहरूलाई लक्षित गरेर बनाइएको भूमिसम्बन्धी कानूनले सरकार र पार्टीलाई नोक्सानी हुने उनले बताइन् ।
उनले सरकारमा भएका केही व्यक्तिहरूको इच्छाअनुसार आएको भूमिसम्बन्धी कानूनलाई संसदबाट जबरजस्ती पारित गरिएको बताइन् ।
‘भूमिसम्बन्धी कानून भू–माफियाको पक्षमा छ । सुकुम्बासीको पक्षमा छैन’, उनले भनिन्, ‘जमिन हडपेकालाई पुर्जा दिने व्यवस्था यसमा छ । यो गलत हो ।’
‘भूमिसम्बन्धी गलत कानून पास भयो । सरकारले गलत कानूनबाट गलत काम गर्दैछ’, नेकपाकी नेतृ झाक्रीले भनिन्, ‘यो गलत नीतिले नेकपा र सरकारलाई समस्यामा पार्छ । केही व्यक्तिका कारण समस्या भयो ।’
उनले पार्टीका कार्यकर्ता र जनताबाट आएका उचित सुझावलाई सरकारले ग्रहण गर्नुपर्ने बताइन् ।
प्रधानमन्त्री केपी ओलीले तलब नलिने कुरा स्वागत योग्य भएपनि अहिलेको समयमा राष्ट्रपतिको कार्यलयदेखि नगरपालिकाको मेयरले समेत नियुक्त गर्ने सहयोगीहरूको संख्या घटाउनुपर्ने उनले बताइन् ।
कोरोना भाइरसको संक्रमणका कारण देशमा ठूलो आर्थिक संकट आउने भन्दै नेकपाकी नेतृ झाँक्रीले सरकारले अहिले देखिनै फजुल खर्च घाउन तत्काल कानून बनाउन आवस्यक भएको बताइन् ।
‘भोलिका दिनमा संकट आउन सक्छ । त्यो अवस्था आउन नदिन सरकारले अहिले देखि फजुल खर्च घटाउने काम गर्नुपर्छ’, उनले भनिन्, ‘प्रधानमन्त्रीको कार्यलय र सचिवालयका साथै राष्ट्रपतिदेखि मेयरसम्मका सचिवालयमा कटौती गर्नुपर्छ ।’
उनले सरकारका हरेक तहतप्कामा बसेकाहरूको सचिवालयको नियुक्ति र सुविधा कटौती गरी कोरोना भाइरसविरुद्धको अभियानमा खर्च गर्नुपर्ने बताएकी छिन् ।
आफ्नो सुझावलाई प्रधानमन्त्री ओलीको सचिवालयमा बसेका १–२ जनालाई मन नपरेको उनले बताइन् । ‘मैले दिएको सुझाव राम्रोसँग पढ्न प्रधानमन्त्रीको सचिवालयका साथीहरूलाई अनुरोध छ’, नेकपाकी नेतृ झाँक्रीले भनेकी छिन्, ‘रचनात्मक सुझाव र सल्लाहलाई प्रधानमन्त्री र उहाँको सचिवालयले ग्रहण गर्न सक्नुपर्छ ।’
