बार्सिलोनाले रियल मालोर्कासंग खेल्दै ला लिगाको उपाधि रक्षा अभियान अघि बढाउने भएको छ । कोरोनाका कारण अबरुद्ध सिजन पुन सुरु हुँदै गर्दा बार्सिलोनाले लिगको पहिलो खेलमा रियल मालोर्कालाई प्रतिद्धन्दीको रुपमा पाएको छ ।
प्रधानमन्त्री पेड्रो साञ्चेजले घरेलु फुटबल पुन सुरु गर्ने औपचारिक घोषणा गरेपछि स्पेनको शीर्ष डिभिजनको ला लिगा मैदान फर्कन लागेको हो ।
नयाँ तालिका अनुसार बार्सिलोनाले जुन १३ मा रियल मालोर्कासंग प्रतिस्पर्धा गर्नेछ । यस्तै, अबरुद्ध सिजनको पहिलो खेलमा रियल बेटिस र सेभिल्ला भिड्नेछन् ।
बार्सिलोनाले लिगमा रियल मड्रिडसंग २ अंकको अग्रता लिएको छ । रियलले पहिलो खेलमा जुन १४ मा ईबरसंग प्रतिस्पर्धा गर्नेछ । यस्तै, बार्सिलोनाले जुन १६ मा लेगानेसलाई आतिथ्यता प्रदान गर्दा रियलले जुन १८ मा घरेलु मैदानमा भ्यालेन्सियासंग खेल्नेछ ।
आयोजकले सुरुवाती दुई चरणको मात्र खेल तालिका सार्वजनीक गरेका छन् । ला लिगा प्रमुख जाभियर ताबेसले जुलाई १९ मा प्रतियोगिता सकिनु अघि हप्तामा हरेक दिन खेल हुने बताएका छन् ।
युरोपको शीर्ष ५ लिग फुटबलमा कोरोना महामारीपछि सुरु हुन लागेको ला लिगा दोस्रो प्रतियोगिता हो । यसअघि बुन्डेसलिगा मेबाट सुरु भईसकेको छ । यस्तै, प्रिमियर लिग समेत जुन १७ बाट सुरु गर्ने तयारी गरिएको छ ।
