एनआईसी एशिया बैंकले आफ्नो सामाजिक उत्तरदायित्व अन्तर्गत काठमाडौंमा ज्याला मजदुरी गर्ने गरिब तथा असहाय परिवारलाई नेपाल प्रहरीसँगको सहकार्यमा पाँच लाख बराबरको चामल, तेल, नुन, दाललगायत खाद्यान्न सामग्री वितरण गरेको छ ।
बैंकका प्रमुख कार्यकारी अधिकृत रोशनकुमार न्यौपानेले महानगरीय प्रहरी कार्यालय रानीपोखरीका डीआईजी विश्वराज पोखरेललाई उक्त खाद्यान्न सामग्री हस्तान्तरण गरे । बैंकले नेपाल प्रहरीसँगको सहकार्यमा वितरण गरेको खाद्यान्न सामग्रीबाट लकडाउनले गर्दा दैनिक छाक टार्न गाह्रो भएका परिवारलाई राहत मिल्ने विश्वास लिएको प्रेस विज्ञप्तिमा उल्लेख छ । कोरोना संक्रमणबाट बच्न सरकारले लकडाउन घोषणा गरिरहेका बेला देशभित्र विकास निर्माणका कामदेखि लिएर कलकारखानाहरूसमेत बन्द रहेको अवस्थामा दैनिक ज्याला मजदुरी गर्नेहरूलाई केही राहत दिन बैंकले सहयोग गरेको हो ।
