२८ साउन, काठमाडौँ । नेपाली काँग्रेसले केन्द्रीय समितिको निर्वाचनमा सभापति पदमा उम्मेदवारी दर्ताका लागि रु. ३० हजार शुल्क प्रस्ताव गरेको छ ।
नेपाली काँग्रेसको बिहीबारदेखि सुरु भएको केन्द्रीय समिति बैठकमा काँग्रेसको निर्वाचन समितिले केन्द्रीय कार्यसमितिको सभापति देखि गाउँपालिका/नगरपालिका वडा कार्यसमिति सभापति निर्वाचनका लागि शुल्क प्रस्ताव गरेकाे हाे ।
निर्वाचन समितिले पेश गरेको निर्वाचन निर्देशिका प्रतिवेदनमा केन्द्रीय कार्यसमिति सभापतिमा उम्मेदवारी दिनका लागि ३० हजार शुल्क प्रस्ताव गरिएको छ भने गाउँपालिका/नगरपालिका वडा कार्यसमिति सभापति निर्वाचनका लागि रु. ५०० प्रस्ताव गरिएको छ । यसअघि केन्द्रीय कार्यसमिति सभापतिका लागि रु. २० हजार शुल्क राखिएको थियो ।
यसैगरी प्रतिवेदनमा केन्द्रीय उपसभापतिका लागि २५ हजार, महामन्त्रीका लागि २० हजार, सहमहामन्त्रीका लागि १५ हजार र केन्द्रीय सदस्यका लागि १० हजार उम्मेदवारी दर्ता शुल्क प्रस्ताव गरिएको छ। प्रदेश महाधिवेशन प्रतिनिधिका लागि रु. ३ हजार, केन्द्रीय महाधिवेशन प्रतिनिधि पदको निर्वाचनका लागि रु. ५ हजार र केन्द्रीय महासमिति सदस्य पदको निर्वाचनका लागि रु. ७ हजार शुल्क प्रस्ताव गरिएको छ ।
काँग्रेसले महाधिवेशनको नयाँ कार्यतालिकामा सहमति जुटाउन सकेको छैन । महाधिवेशन कार्यतालिकाका बारेमा शीर्ष नेताहरुबीच निरन्तर छलफल भएपनि सहमति जुट्न नसकेको हो । बिहीबार केन्द्रीय समिति बैठक बस्नुअघि शीर्ष नेताहरुबीच महाधिवेशनको नयाँ कार्यतालिकाका विषयमा भएको छलफलले केन्द्रीय सदस्यहरुको सुझावपछि मात्रै महाधिवेशनको नयाँ कार्यतालिका ल्याउने भएको छ ।
